Kreft i endetarmsopning (Anal cancer)

Kreft lokalisert i endetarmsopning og opp til 4 - 5 cm frå analopninga blir kalla analkanalkreft, mens kreft som oppstår i huda omkring endetarmsopning i ein avstand inntil 5 cm blir klassifisert som perianal kreft.
I Noreg blir analcancer påvist hos 40 - 50 nye pasientar årleg. Kreftforma opptrer frå 40-årsalderen, men er vanlegast rundt 50 - 60 år. Sjukdommen er dobbelt så ofte hos kvinner som hos menn.

Av Kreftavdelinga, Haukeland universitetssjukehus

Vortevirus (humant papillomvirus, HPV) blir påvist hos dei fleste pasientane og sett på som ein av dei viktigaste årsaksfaktorane for denne sjukdommen.

Symptom
Typiske symptom ved analkreft er ein hard, uøm tumor (svulst) av og til med sårdanning. Andre symptom er smerter, bløding, lekkasje av avføring og slim, kløe eller sårhet i eller rundt analopninga eller eksem i eller rundt analopninga.