Hormonlaboratoriet ved Haukeland universitetssjukehus er det eldste hormonlaboratoriet i landet og blei opna i 1956. I 2009 flytta vi inn i nye lokale i 8. etasje i Laboratoriebygget. Vi har dei siste åra gjennomgått store organisatoriske endringar, og i dag disponerer vi omkring 19 årsverk. Samtidig har vi vore vitne til ein gradvis auke i talet på analysar. Totalt blir det gjennomført omkring 450.000 analysar årleg fordelt på 53 forskjellige analysar. Dei fleste analysane er basert på immunologisk teknikk. Vi kan likevel tilby analyse av vitamin D og kortisol ved hjelp av massespektrometri, men vi har som mål å kvantitere mengda av fleire steroid ved hjelp av same metode. I tillegg til å betene klinikarane i diagnostikk og oppfølging av pasientane er vår verksemd retta mot å auke kompetansen innan medisinske problemstillingar i form av forsking og undervising. Viktige forskingsfelt inkluderer blant anna fedme, diabetes, beinskjørheit og kreft.
Endokrinologiske utgreiingar omfattar i stor grad måling av hormonkonsentrasjonar i serum/plasma/urin. Hormonkonsentrasjonar i serum/plasma varierer gjennom døgnet, med alder, kjønn, pubertetsstadium, menstruasjonssyklus, graviditet, kroppsstilling (liggande/oppreist), fysisk og psykisk belastning, måltider, medikament etc.
For dei enkelte analysane er det gitt korte merknadar om forhold av særleg betyding.
For at laboratoriet skal vere i stand til å gi eit mest mulig meiningsfylt svar, er det av vesentleg betyding at rekvirenten gir relevante kliniske opplysningar.