Haukeland universitetssjukehus har som mål å gi pasientane ei behandling som er kjenneteikna av høg kvalitet og tryggleik. Ein utstrekt forskingsaktivitet er den beste garanti for å sikre dette. Derfor er forsking ei av dei fire hovudoppgåvene til sjukehuset, saman med pasientbehandling, utdanning og opplæring av pasientar og pårørande.
Haukeland har det nest største medisinsk- og helsefaglege forskingsmiljøet i Noreg. Over 600 personar på Haukeland er involvert i forskingsverksemd, fordelt på om lag 190 årsverk. Den største forskingsaktiviteten finn du innan somatikken, men dei siste åra har det også vore ein auke i psykiatrien. I tillegg er anna helsefagleg forsking på full fart framover og blir større for kvart år.