Opna nytt psykiatritilbod til unge 

I dag var det offisiell opning av nytt bygg for Avdeling for tidleg psykose (ATP) i Sandviken. Administrerande direktør Stener Kvinnsland (t.v) delte ut jordbær til avdelingssjef Rune Kroken og klinikkdirektør Kristin Bovim.

- Unge menneske som utviklar psykose, må ha lett og rask tilgang til effektiv behandling. Nystarta Avdeling for tidleg psykose (ATP) er ei spesialavdeling for utgreiing og behandling av unge med alvorlege psykiske lidingar, seier avdelingsleiar for ATP Rune Kroken.

Kroken fortel at dei fleste som får psykoselidingar, får dette i slutten av tenåra eller som ung voksen. Ifølgje Kroken utviklar ein psykose seg normalt over tid, og i starten kan sjukdommen gje litt diffuse symptom.

- Dette kan gjere at denne alvorlege sjukdommen er vanskeleg å fange opp. Eit lågterskel vurderingsteam er derfor viktig for at unge ikkje skal gå lenge med ubehandla psykose, seier Kroken.

Avdeling for tidleg psykose (ATP) er eit nytt høgspesialisert behandlingstilbod til unge med schizofreni-lidingar. Avdelinga blei etablert 1. januar i år, og i dag var det klart for innflytting i nye lokale i Sandviken. Eitt år med byggearbeid er over, og no står huset med sine 2347 kvadratmeter klart. Nybygget husar to døgnseksjonar og det oppsøkjande lågterskelteamet TOPS (Tidlig Oppdagelse av Psykose).

Ein stor gymsal gir gode moglegheiter for å nytte fysisk aktivitet og trening i behandlinga, noko som er viktig for å motverke passivitet, auke meistring og redusere livsstilsrelaterte sjukdommar som er hyppige ved psykoselidingar.

Styreleiar Ranveig Frøiland: - Eg håper bygget  skal sikre pasientane eit optimalt behandlingstilbod og ønskjer lykke til med nybygget.

-No kan vi ta imot pasientar i moderne lokale med fine pasientrom og ein eigen aktivitetsavdeling. Her har vi alt vi treng for å kunne tilby spesialisert utgreiing og behandling i trygge omgjevnader, så dette vil vere eit stort framskritt for denne pasientgruppa, seier avdelingsleiaren.
Prislappen for heile byggeprosjektet kjem på omlag 89 millionar kroner.