Nytt senter for diabetesforsking opna i Bergen  

– Kan vi bidra til å gjere kvardagen til den enkelte diabetespasient betre, har vi oppnådd noko med forskinga vår, sa Pål Rasmus Njølstad ved markeringa.

KG Jebsen Senter for diabetesforsking skal bidra til å finne nye diabetesgener, kartlegge nye mekanismar for korleis diabetes utviklast og etablere målretta og betre behandling.

Senteret har samla fagfolk innan klinisk, genetisk, epidemiologisk og eksperimentell diabetesforsking i eitt laboratorium som vil bli lokalisert til det nye Barne, og ungdomssenteret ved Haukeland universitetssjukehus.

Senteret vil bestå av fem forskingsgrupper, og kan bli eit kraftsenter innan diabetesforskinga.

Senteret vil få eit bidrag frå Stiftelsen Kristian Gerhard Jebsen på fire millionar kroner per år i fire år framover. I tillegg kjem økonomisk støtte frå UiB og Haukeland universitetssjukehus.