Frå Folkevogn til Jaguar innan ultralyd 

Det var ein spesiell stemning då Revmatologisk avdeling mottok gåva frå GC Rieberfondane og Rebekka Ege Hegermanns Legat.


Christian Rieber frå GC Rieberfondane og styreleiar Øyvind Digranes frå Rebekka Ege Hegermanns Legat fekk æra av å opne den nye ultralydmaskina.

Tysdag føremiddag fekk Revmatologisk avdeling på Haukeland universitetssjukehus overrekt ein ny ultralydmaskin med meir avansert bildeteknologi. Bakgrunnen er ei pengegåve på over ein million kroner.

Fag i endring
- Faget vårt er i ein veldig endring og spesielt innan behandling av leddgikt. Tidlegare kunne vi lindre smerter og funksjonstap. I dag kan vi stoppe sjukdomsprosessen og kanskje til og med håpe på heling. Ultralydmaskina er ein enorm ressurs i arbeidet med dette, seier Gjesdal.

Ho fortel også at den nye maskina vil forandre kvardagen til dei som jobbar på avdelinga. Apparatet er i ein heilt eigen klasse.

Givarane ville sjå korleis maskina fungerar og følgde nøye med under demonstrasjonen

Sjå det vi kjenner
- Vi er gode på å stille diagnosar og ved hjelp av den nye maskina kan vi sjå det vi kjenner. Vi kan ha pasienten på benken, snakke, kjenne og sjå samstundes. Bileta er så skarpe som MR-bilete, og når pasientane våre skal ta MR må dei til Radiologisk avdeling. Der kan det vere ventetid på opp til 4 månadar. Som revmatolog er det umulig å ikkje bli begeistra, seier Gjesdal.

 
Styrkar pasientbehandlinga
Avdelingsdirektøren påpeikar at det ikkje berre er personalet på Revmatologisk avdeling som har grunn til å vere oppglødd over den nye ultralyden.

- For pasientane våre inneber dette at vi kan stille diagnosen tidlegare. Vi kan sørgje for at dei får riktig behandling og vi kan hindre ytterlegare skade i ledda.

531.250 kronar x 2
- Endeleg var det Revmatologisk avdeling sin tur. Vi er nøgd til å bidra i eit så vellukka prosjekt som dette. Ikkje minst fordi det er så tydeleg at revmatologiske pasientar kan få mykje betre behandling på grunn av denne maskina, sa Christian Rieber frå GC Rieberfondane under den offisielle overrekkinga.

Saman med Rebekka Ege Hegermanns Legat har dei to gitt 531.250 kroner kvar til den nye supermaskina.