For lange svartider på vevsprøvar 

I Helsetilsynet sin rapport står det at ” pasientar blir påført ei urimeleg belastning ved at det tar for lang tid å få svar på vevsprøvar frå Avdeling for patologi.”

Elles slår rapporten fast at Helse Bergen har ”god kvalitet på utgreiing og diagnostikk, og ventetidene for å få radiologisk og kirurgisk utgreiing er for tida innanfor dei nasjonale tilrådingane”.

Tilsynet omfatta den kirurgiske og patologiske delen av utgreiinga som føregår på sjukehuset. Avdeling for bryst-og endokrinkirurgi fekk verken merknader eller avvik.

Tar for lang tid
Avviket ved Avdeling for patologi byggjer blant anna på at
 

• median ventetid ved grovnålsbiopsi (sylinderbiopsi) for å få avklart diagnose ved spørsmål om brystkreft er 10 dagar.
• Ventetid for frysesnitt under operasjon for å få avklart om ytterlegare inngrep er nødvendig er 30 til 75 minutt, og fører regelmessig til unødig forlenging av operasjonar.
• Det er opptil 4-5 vekers ventetid på histologiske svar på det operative preparatet som er avgjerande for val av vidare behandling.

I gang med endringar
 Avdelingssjef Lisbet Sviland har forståing for at Helsetilsynet reagerer på lange svartider.
 
– Vi er alt godt i gang med å endre på dette, opplyser ho.

– Vi har sett i verk strakstiltak når det gjeld ventetid på frysesnitt og histologiske svar, men vi er også i gang med meir langsiktige prosessar.

Det omfattar både ombygging, modernisering og fokus på arbeidsflyt og arbeidsprosessar på avdelinga.

– Når det gjeld nålebiopsi har vi hatt tradisjon for å gi foreløpige, munnlege svar, i faste samarbeidsmøte  med kirurgar og radiologar kvar veke, seier Sviland.

– Det endelege, skriftlege svaret kjem gjerne noko seinare, derfor er median ventetid 10 dagar.

Mål om å redusere
I 2009 søkte Avdeling for patologi om og fekk tildelt 14 millionar kroner til automatisering og modernisering av histologilaboratoriet, med eit klart definert mål om å redusere svartidene.

– Dette er ein prosess som vi er i gang med, men som ikkje vil bli ferdig før utgangen av 2010. I mellomtida har vi no eit opplegg som vil prioritere preparat med ein muleg kreftdiagnose, seier Sviland.

– Heile avdelinga jobbar saman om dette, og vi gjer det vi kan for å forbetre situasjonen.

Undersøkte internkontrollen
Tilsynet, med tema utgreiing, diagnostikk og logistikk ved brystkreft ved Haukeland universitetssjukehus, vart gjennomført i juni.

Formålet var å undersøke om helseføretaket innan dette området har styring (internkontroll) som sikrar at krav i helselovgivinga vert oppfylte. Forsinka  diagnostikk, pasienttryggleik og krav til forsvarleg verksemd var sentrale vurderingstema.

Tilsynet avdekka ikkje uklare forhold når det gjeld organisering eller fordeling av ansvar og oppgåver.