Fleire rusplassar til dei yngste  

Unge rusavhengige mellom 18 og 30 år kan få hjelp ved Floenkollektivet som tilbyr frivillig rusbehandling.

- Tilbakemeldingar frå dei andre i elevgruppa har vore gull verd for meg, sa eleven* til alle frammøtte ved markeringa fredag. Han kom til behandling for omlag eitt år sidan, er i dag rusfri, under utdanning og får framleis oppfølging i Floenkollektivet.



Viktig satsing på rusbehandling: Frå venstre: styreleiar Ranveig Frøyland i Helse Bergen. Her saman med fagsjef i Floenkollektivet David Walker og seksjonsleiar Birthe Møgster ved avdeling Manger.

- Kronene som er brukt i rusbehandling er gode investeringar. Dei gir avkastning i både livskvalitet og mange leveår, sa styreleiar Ranveig Frøyland i Helse Bergen. Ho fekk omvising på garden saman med alle gjestane som var invitert ut hit.

Sjå enda fleire, heilt nye foto frå Floenkollektivet


Kortare ventetid
Ventetida for å kome til på døgnplass ved Floenkollektivet er for tida ti veker. Tidlegare har den vore opp mot eitt år.

Av dei 34 døgnplassane i Floenkollektivet er 18 på Manger, medan resten er fordelt på dei to bustadane Floenkollektivet har i Bergen sentrum.

Poliklinikk før og etter behandling
På Danmarksplass har Floenkollektivet ein poliklinikk. Der kan rusavhengige kome til førebuande samtalar før dei er klare til å starte med døgnplass på Manger.

Langtidsoppfølging etter avslutta døgnbehandling er det andre tilbodet som blir gitt ved poliklinikken.

Opptil fleire år etter avslutta behandling, kan det vere behov for å kome til jamnlege behandlingssamtalar ved poliklinikken.

Foreldrerollen
Torsdag forrige veke starta foreldregruppe for rusavhengige som sjølve har barn. Foreldregruppa er eit etterlengta tilbod der elevane kan snakke saman og dele erfaringar om blant anna korleis verte ein god rollemodell for sine eigne barn.

Ulike gruppebehandlingar som tar tak i sentrale problemstillingar i livet er ein viktig del av behandlinga ved Floenkollektivet.

Medikamentfritt
Behandlinga går føre seg utan bruk av medisinar, i motsetnad til LAR (legemiddelassistert rehabilitering). Totalt 87 unge er tida til behandling ved dei forkjellige delane av Floenkollektivet.

*Elev ikkje pasient
Floenkollektivet brukar begrepet elev om dei rusavhengige som er til behandling. Begrepet kjem frå modellen terapeutisk samfunn som ligg til grunn for rusbehandlinga.

Innsøking
Rusavhengige mellom 18 og 30 år kan få plass ved Floenkollektivet. Floen driv ikkje tvangsbehandling, men frivillig rusbehandling for denne gruppa. Lege eller NAV-kontor kan søkje til inntakskontoret til Avdeling for rusmedisin.