Etiske retningslinjer 

– Dei etiske retningslinjene er viktige premissgivarar for ønskt åtferd og kultur i føretaksgruppa.  Dei trekkjer opp dei forventningane som føretaksgruppa har til medarbeidarane, og gir nokre få og enkle reglar som det er mogleg å etterleve i praksis, seier styreleiar i Helse Vest RHF, Oddvard Nilsen.

Føretaksgruppa i Helse Vest er bevisste på etiske problemstillingar i helsetenestene generelt og pasientbehandlinga spesielt, både faglege problemstillingar og problemstillingar som gjeld menneskerettar, arbeidslivsstandard, miljø og korrupsjon. No gjeld det å operasjonalisere dei etiske retningslinjene som ein naturleg del av kvardagen på alle nivå i føretaksgruppa.

– Retningslinjene skal vere til hjelp i vanskelege situasjonar vi kan møte i arbeidet vårt i Helse Vest. Det kan vere i situasjonar som gjeld oss som fagperson, kollega eller leiar. Som vedlegg til dei etiske retningslinjene er det ei omfattande samling av dokument som kvar for seg gir ei nærare etisk tilnærming til eit avgrensa område, seier Nilsen.

Dei etiske retningslinjene gjeld for alle medarbeidarar i Helse Vest.
Føretaksgruppa Helse Vest har ansvar for å yte spesialisthelsetenester til befolkninga på Vestlandet. Verksemda skal vere kjenneteikna av høg etisk standard.

Dei felles etiske retningslinjene blei vedtekne av styret i Helse Vest RHF 7. mai 2012.

Dei etiske retningslinjene med alle vedlegg ligg på www.helse-vest.no/etikk.